वारणानगर / प्रतिनिधी
शाहुवाडी पन्हाळा विधानसभा मतदार संघाचे आम. विनय कोरे ( सावकर ) व वारणा बँकेचे अध्यक्ष निपुण कोरे यांच्या मातोश्री शोभाताई विलासराव कोरे ( वय -७७ ) यांचे आज सोमवार दि. १२ रोजी पहाटे सोलापूर येथे निधन झाले. श्रीमती शोभाताई कोरे गेल्या काही दिवसापासुन आजारी होत्या . सोलापूर येथे असणाऱ्या कन्या व जावई यांच्या हॉस्पीटलमध्येच त्यांच्यावर उपचार सुरू होते.
वारणा समूहाचे संस्थापक वारणा खो-याचे भाग्यविधाते सहकारमहर्षी तात्यासाहेब कोरे, वारणा साखर कारखान्याच्या अध्यक्षा स्व.श्रीमती सावित्रीआक्का विश्वनाथ तथा तात्यासाहेब कोरे व विलासराव कोरे यांच्या कार्याचा, संस्कारांचा वसा व वारसा समर्थपणे श्रीमती शोभाताई कोरे यानी चालवत सहकार, शिक्षण,महिला सबलीकरण या क्षेत्रात आदर्श कार्य केले. महीला उद्योग व शिक्षण क्षेत्रात सर्वांना मार्गदर्शक ठरलेल्या शोभाताई कोरे या वारणा समूहात ‘आईसाहेब’ या नावाने सर्वत्र परिचित होत्या. श्री. तात्यासाहेब कोरे वारणा सह.साखर कारखाना, वारणा महिला उद्योग समूह, वारणा बझार, चैतन्य मतिमंद मुलांची शाळा, शारदा वाचन मंदिर,, निवृत्ती सह. गृह निर्माण संस्था, महात्मा गांधी मेडिकल ट्रस्ट या सर्व संस्थाच्या त्या अध्यक्षा होत्या. श्रीमती शोभाताई कोरे यांच्या निधनाने वारणा समूहासह परिसरावर शोककळा पसरली आहे.