कोल्हापूर / मिलींद बारवडे
महाराष्ट्र शासनाच्या शालेय शिक्षण विभागाने ११ डिसेंबर रोजी चतुर्थश्रेणी कर्मचाऱ्यांच्या भरतीबाबत काढण्यात आलेल्या अन्यायकारक आदेशाची जाहीर होळी कोल्हापूर विभागीय शिक्षण उपसंचालक यांच्या कार्यालयासमोर शिक्षकेत्तर संघटना, मुख्याध्यापक संघ, शिक्षण संस्थाचालक संघ व कोल्हापूर जिल्हा शैक्षणिक व्यासपीठाने केली. या आंदोलनाचे नेतत्व शैक्षणिक व्यासपीठाचे अध्यक्ष एस डी लाड, चेअरमन सुरेश संकपाळ , शिक्षक नेते दादासाहेब लाड ,बाबासाहेब पाटील , डी. एम. पाटील व शिवाजी माळकर यांनी केले.
विभागीय शिक्षण उपसंचालक सत्यवान सोनवणे यांना निवेदन देतांना वरील मान्यवर.
शासनाच्या आदेशाच्या जाहीर होळीनंतर वरील सर्व संघटनातर्फे शिक्षण उपसंचालक सत्यवान सोनवणे यांना निवेदन देण्यात आले. शासनाने सदरचा आदेश त्वरीत मागे घेतला नाहीतर राज्यभर तीव्र आंदोलन करण्याचा इशारा देण्यात आला.
या आंदोलनाचा एक भाग म्हणून शुक्रवार दि. १८ डिसेबंर रोजी कोल्हापूर जिल्हा अधिकारी कार्यालयासमोर सकाळी ११ ते ५ या वेळेत धरणे आंदोलन केले जाणार आहे. आंदोलनात कोल्हापूर जिल्हयातील सर्व शिक्षण संस्थाचालक, मुख्याध्यापक, शिक्षक व शिक्षकेत्तर कर्मचारी आणि विविध शैक्षणिक संघटनांचे पदाधिकारी सहभागी होणार आहेत. अन्यायकारक शासन आदेशाची होळी करण्यापूर्वी मुख्याध्यापक संघाच्या विद्याभवन कार्यालयात वरील सर्व संघटनांची सभा होऊन हा आदेश रद्द होईपर्यंत तीव्र आंदोलन करण्याचा निर्णय घेण्यात आला.
यावेळी माजी शिक्षक आमदार भगवानराव साळुंखे, पुंडलिक जाधव, खंडेराव जगदाळे, भरत रसाळे, सुधाकर निर्मळे, डी.एम. पाटील , गणपतराव बागडी, डी.एस.घुगरे, प्रा. सी. एम. गायकवाड, उदय पाटील, के. के. पाटील, संजय पाटील , चंद्रकांत लाड, मिलींद बारवडे, संदीप पाटील, अभिजीत गायकवाड, काकासाहेब भोकरे, राजेंद्र सुर्यवंशी,जगदीश शिर्के आदी प्रमुख पदाधिकारीसह विविध संघटनांचे पदाधिकारी उपस्थित होते.
११ डिसेबंरच्या अन्यायी शासन आदेशाची होळी करतांना माजी आ. भगवानराव साळुंखे, एस डी लाड , दादासाहेब लाड, बाबासाहेब पाटील, सुरेश संकपाळ, खंडेराव जगदाळे.