शिरोली /प्रतिनिधी
हातकणंगले तालुक्यातील शिरोली औद्योगिक वसाहतीमधील के. अँड के. क्राफ्टस्मन कंपनीच्या दोघा जणांविरोधात गुन्हा दाखल करण्यात आला आहे. समीर उत्तमराव काळे (रा. कदमवाडी रोड, लक्ष्मणराव मोहिते कॉलनी, कोल्हापूर), विवेक मदन कावळे (रा. फंटासिया रहेजा गार्डन, एलबीएस मार्ग, ठाणे) या दोघांनी भविष्य निर्वाह निधीची रक्कम १५ लाख १७ हजार ५९२ रुपयेचा गैरव्यवहार केला आहे . या दोघांविरूद्ध एमआयडीसी पोलीसात भविष्य निर्वाह निधी कार्यालयातील अधिकारी प्रकाश जयपाल नाईक (वय ५६) यांनी फिर्याद दिली आहे.
याबाबत पोलिसांनी दिलेली माहिती अशी कि, राज्य राष्ट्रीय कामगार संघ (इंटक) या संघटनेचे जिल्हा सचिव प्रदिप विलास कांबळे यांनी के अँड के क्राफ्टस्मन या कंपनीने ४५ कर्मचाऱ्यांची भविष्य निर्वाह निधीची रक्कम जमा न केल्याची तक्रार भविष्य निर्वाह निधी कार्यालयाकडे केली होती. त्यानुसार अधिकारी नाईक यांनी कार्यालयातील रेकॉर्डची तपासणी केली असता त्यांना २०१४ ते २०१९ या कालावधीमधील कंपनीच्या कामगारांच्या वेतनातून कपात केली . मात्र जमा रक्कम भरली नसल्याचे लक्षात आले. भविष्य निर्वाह निधीची रक्कम १५ लाख १७ हजार ५९२ रुपये ही कार्यालयाकडे जमा न करता ती स्वताःसाठी वापरुन संगनमताने अपहार केल्याचे उघड झाले. या प्रकरणाचा पुढील तपास सहाय्यक पोलीस निरीक्षक किरण भोसले यांच्या मार्गदर्शनाखाली पोलीस हवालदार एस.बी.मुल्ला करत आहेत.