पोलीस ठाणेपासून हाकेच्या अंतरावर फोडली तीन बंद घरे

हातकणंगले /प्रतिनिधी

     हातकणंगले पोलीस ठाणेपासून हाकेच्या अंतरावर अज्ञात चोरट्यांनी तीन बंद घराचे दरवाजे उचकटुन रोख रक्कम , चांदीच्या दागिन्यासह घरगुती उपयोगाच्या वस्तू काल रात्री चोरून नेल्या आहेत. चोरीस गेलेल्या मुद्देमालची रक्कम 18750/- रुपये असून चोरट्यांनी चोरी करताना आजूबाजूच्या घरांना कडी लावल्याने नागरिकांत घबराट पसरली आहे . याबाबतची फिर्याद आप्पासो श्रीपाल उळागड्डे यांनी हातकणंगले पोलिसात दिली आहे.

       याबाबत अधिक माहिती अशी की , हातकणंगले पोलीस स्टेशनपासून हाकेच्या अंतरावर उच्चभ्रू लोकांची साई कॉलनी आहे. या कॉलनीत काल रात्री अज्ञात चोरट्यांनी प्रशांत सुनीलकुमार कोळी यांच्या घरात राहणाऱ्या भाडेकरूच्या घरातून रोख तीन हजार रुपये व चार हॅन्ड पर्स चोरून नेल्या. तर फिर्यादी आप्पासो उळागड्डे यांच्या घरातील रोख रक्कम 7250 /- रुपये व रावसाहेब लहू शिंगे यांच्या घरातील भाडेकरू असलेले शानूर शिकलगार यांच्या बंद घरातील घरगुती गॅसची टाकी , चांदीचा छल्ला , व पैंजण असे एकूण आठ हजार पाचशे रुपयांचा मुद्देमाल चोरून नेला. घटनेची नोंद हातकणंगले पोलिसात झाली असून पुढील तपास हातकणंगले बीट अंमलदार एम्.सी. सुतार करीत आहेत.