लाचेची मागणी केल्यास तात्काळ संपर्क साधावा – सरदार नाळे
कोल्हापुर / प्रतिनिधी
खरेदी केलेल्या घराची मालकी हक्कात नावाची नोंद करण्यासाठी तीन हजार पाचशे रुपयाची लाच स्वीकारताना कोल्हापूर महानगरपालिकेच्या दोन लिपिकांवर कारवाई करण्यात आली . शेखर अरुण पाटील (वय – २६ वर्ष , रा. मंगळवार पेठ , शाहू बँकेजवळ ,माने गल्ली , कोल्हापूर . व रोहित विनायक जाधव (वय वर्ष – ३२ , रा. मंगळवार पेठ , तस्ती गल्ली , मारुती मंदिराजवळ , कोल्हापूर . अशी त्यांची संशयित आरोपींची नावे आहेत . ही कारवाई पोलीस अधीक्षक अमोल तांबे , अप्पर पोलीस अधीक्षक विजय चौधरी , यांच्या मार्गदर्शनाखाली पोलीस उपअधीक्षक सरदार नाळे , पोलीस निरीक्षक बापू साळुंके , पोलीस हेड कॉन्स्टेबल विकास माने , सुनील घोसाळकर , पोलीस नाईक सचिन पाटील , पूनम पाटील यांनी केली .
अधिक माहिती अशी की , कोल्हापूर महानगरपालिकेमध्ये तक्रारदार यांनी मालकी हक्कात नोंद करण्यासाठी अर्ज केला होता . त्यानंतर नोंद करण्यासाठी मुकादम तथा लिपिक शेखर पाटील यांनी तक्रारदार यांच्याकडे 5000 रुपयाची मागणी केली . त्यास दुसरे लिपिक रोहित जाधव यांनी प्रोत्साहन दिले . त्यानंतर तडजोडीअंती तीन हजार पाचशे रुपये देण्याचे ठरले . तक्रारदार यांनी लाचलुचपत विभागाशी संपर्क साधला . त्यानंतर तक्रारदार यांचे कडून लाचेची रक्कम ३५००/ – रुपये स्वीकारताना रंगेहात पकडण्यात आले . दोन्ही संशयित आरोपींना ताब्यात घेऊन त्यांच्यावर रात्री उशिरापर्यंत राजारामपुरी पोलीस स्टेशनमध्ये गुन्हा नोंद करण्याचे काम सुरू होते .
तसेच लाचलुचपत विभागाकडून कोल्हापूर जिल्ह्यातील सर्व नागरीकांना आवाहन करण्यात आले आहे की, कोणत्याही शासकीय कार्यालयातील अधिकारी अथवा कर्मचारी यांनी किंवा त्यांच्या वतीने खाजगी व्यक्ती (एजंट) कोणतेही शासकीय काम करून देण्यासाठी कायदेशीर फी व्यतिरिक्त अन्य लाचेची मागणी करीत असल्यास तात्काळ आमच्याशी संपर्क साधावा. तसेच तक्रार दिल्यानंतर फिर्यादीचे कोणतेही शासकीय काम थांबणार नाही. असे आवाहन लाचलूचपत प्रतिबंधक विभागाचे पोलीस उप अधीक्षक सरदार नाळे.
यांनी केले असुन 9673506555 मो.नं. वरती व खालील कार्यालयीन क्रमांकावर 0231- 2540989 संपर्क साधावा . तसेच मेल आयडी dyspacbkolapur@gmail.com यावर सुद्धा आपण आपली तक्रार नोंदवू शकता. व टोल फ्रि क्रं. 1064 असल्याचे कळविण्यात आले असुन दिलेल्या तक्रारीबाबत आपलं नाव गुप्त ठेवण्यात येईल. असे सांगण्यात आले आहे .
